Act 13 | ASO | STEP | Izesu' evenele zuho ma Adiokia ebeku' minani' nete vovo'ningu' O'moso'mi gamazi li soto' igi apizi ngimaa' ave linge minani' nene gulive'ine Banabasi' ve ido' Simeoni' ado' gulive gohi ma Gonobu' ve lo minine' nesi ido' Lukio' aza Kilene ebekuti' ve ido' Manaeni' aza guvelesi ve Helodekisi uvoloho akunolo gili gana gana naba asive nesi ido' Saulokisi ve.

Acts 13

Banabasiki Sauloki Mono' Gono Di Ebe' Mala Vilisive Li Di Oti-ngidani' Gamazi

1 Izesu' evenele zuho ma Adiokia ebeku' minani' nete vovo'ningu' O'moso'mi gamazi li soto' igi apizi ngimaa' ave linge minani' nene gulive'ine Banabasi' ve ido' Simeoni' ado' gulive gohi ma Gonobu' ve lo minine' nesi ido' Lukio' aza Kilene ebekuti' ve ido' Manaeni' aza guvelesi ve Helodekisi uvoloho akunolo gili gana gana naba asive nesi ido' Saulokisi ve. 2 A'mine ve nete monokumu' noso' nite' malise igi mini O'moso opo'ni li gono've nidavo O'moso'mi Sikalahu' ne'mo ti' lo lo-ngimine': Banabasiki Sauloki gono dalisive lo do nenita uvongumu' nene a'mine ve ne di kegesi mili-nidilo. 3 Lavo noso' nite' malise igi O'mosola li mini a'ine godo'nido' hiti di kegesi-ngidi ngimiselikevo vasine'.

Banabasiki Sauloki Kipilo Ailaniu' Mono' Li-ngimi'mi Vasine' Gamazi

4 Ingine O'moso'mi Sikalahu' ne'mo ngimiselavo Seleukia ebeta lomi vi sipiu' dizi Kipilo ailaniu' vasine'. 5 Kipilo ailaniu' vi heteli a'midaa minine' ebe' Salami neu' vi Zuda veti mono' numuno minido' minido' O'moso'mi gamazi li soto' igi li-ngimasine'. Ido' ne'mine igi nizasivo Zohane' ado' gulive've gohi ma Maleko' ve lo minine' ne'mo gelekele' o-ngedo hize ele' o-ngedo minine'. 6 Ne'mine igi Salami ebe' huli Kipilo ailani lumola ivile' igi vi Pahosi ebeku' hetelani'. 7 Heteli nela Zuda ve ma aza mino soza gamazi lo soto' ogo minaa' ive ma gulive Bala Izesu' ve lo minine' ma ningani'. A'mine ve nene Kipilo aleveti guve'inesi ve naba gulive Selegio' Paulo' aza galau' vevese minine' minani' neivo maka' minasine'. Guvelesi ve Selegio' aza Banabasingi Saulongi elese molo ngemo O'moso'mi gamazi gelelesa longo' longo' o-ngidine'. 8 Ne'mine ogavo a'mine ve nene Elimasi' (mene gulive'mi monovo ti' lo neive: Ani' amani' ogo minaa' ive ve.) A'mine ve aza engi' gamazi lasido' nene guvelesi ve'mo gele ele'vole' olosa giline' nene hulilive lo a'mine gamazilo' e'menga lo-ngimine'. 9 Ne'mine ine'za Saulo' gulive gosoho' Paulo' ve lo minine' nene O'moso'mi Sikalahu've ne'mo lulou' gono davo vonu' gisili hize-de mino 10 ti' lo lo-imine': Gaza Satani'mi gipele mino soza saza lo evene' go'ine gohi izo lisihe' amani' inite' mata' ogo inite' lamine' muki' lovo o-ngemaa' anive gaza Guvelesi ve'mi aka lisihe' nene do gopo' napa' oga' naine' nene alo' hulamane. 11 Nemu' Guvelesi ve'mo amuzolotunu' gebelavo veka likavo gamene ma alingu' holi'mi labanala ma ningamo haza minelesane. Nolivo noline' velesi lite' lo limuso ne'mine gele vine' ne'mo velelo' liti'muso izavo analo' di monilizavemu' vise' ogo minine'. 12 Ne'mine ogavo soto' ine' inite' ningo misubou' veti guvelesi ve aza Guvelesi ve'mi monokumu' giline' gasava hizavo gele ele'vole' ine'.

Pauloki Banabasiki Pisidia Misubou' Adiokia Ebeta Gono Dasine' Gamazi

13 Paulo' ve ido' ezesi monavesi Pahosi ebe' huli sipiu' dizi Pamahilia misubou' Pelega ebeta vi hetelani'. Heteli Zohane' aza hulo-ngedo Zelusalemi numuda do tine' molo vine'. 14 Ne'mine ogavo ingine Pelega ebe' huli vi Pisidia misubo'mi gahevela Adiokia ebeta nene vi hetelasine'. Heteli mini holiseku' nene Zuda veti mono' numungu' dizi minasine'. 15 Nizasivo Mose' gizine' gamaziuti' gati O'moso'mi gamazi li soto' iga' ave polohetelite gizikani' gamazi mauti' gati mono' gizebo ve ingine elese mili ngimi ti' li li-ngimani': Zogole zuho matise evene' leze mulude do gili' lo-ledeline' gamazi lengita ma neivo ma ma li-limilizo. 16 Ti' li li-ngimikevo Paulo' aza oto elese' iki minilizave lo ana do oto avazaha ogo ti' lo line':

Isilaele' alevesi ido' evene' linge ma O'mosomu' golise gilaa' nani' masi lingine gililo. 17 O'moso aza Isilaele' aleve lezemu' eze zuho minilizave lo avotemotine do kegese-ngedo Aigita misubouko venenga ve gili nizavo do amuzo molo-ngedo neivo hizi hutile' ani'. Ne'mine ikevo goboni mili-ngidi minanguti' amuzo molo ngele'mizo ebe' hadivelo' novivo 18 ingine goloso nite' i'mi vangumu' gosele' belamivo gizebo o-ngede'mo vo neivo kilisimasi foti (40) ogo vine'. 19 Ne'mine ogo Kanaha misubou' evene' gulive'ine ato atokisi zuho seveni nene ngebele gese' ogo engi' misubo'ine nene avotemotine ize' molo ngemavo go'nido' go'nido' di nizavo kilisimasi fo hadeti fifti (450) ogo vine'. 20 Ogo vavo gizebo ve do kegese-ngedo hulo-ngedavo mini'mi nivavo alinge' O'moso'mi gamazi lo soto' ilive Samuveli soto' ine'. 21 Soto' ogo neivo avotemote ingine guvelesi ve naba lolo' ili ve mamu' longo' ikevo O'moso'mo Benizamini' a'vopilemo' zuhouti' ve ma Kisi' gipele Saulo'ni do soto' o-ngedavo Saulo' aza guve'inesi ve lolo' ogo neivo Kilisimasi foti (40) ogo vine'. 22 Alinge' nene Saulo'ni do hulo-do Davidi'ni do soto' ogo guve'inesi ve lolo' ogo minelive lo do ngimine'. Ido' ezemu' ti' lo line': Naza Zesai' gipele Davidi' nene neni' vo'nelo' minive minavo ninguvoni' ve. Aza na'nise giluvodo' inite' ogo molo oloseive lo line'. 23 Ido' O'moso'mo Davidi'ni lo huko-dine' gamazi ma do gihile izo a'mine ve'mi a'vopilemo' zuhouti' ve ma Izesu'ni nene Isilaele' aleve do lu' izelive minelive lo ele'mize molani'. 24 Ido' Izesu' nene olihe gono've api' ogo damivo Zohane' aza gomu' ogo lo soto' ogo Isilaele' alevekizo, lingine lutine di velepe' izi lihimetine huli mono' noso hilalizave lo lo-limine'. 25 Ti' lo lo-lemo gono've do pelelesa noogo ti' lo lo-ngimine': Lingine nenikumu' gili O'moso'mo do lu' izelive lo imiselelesa live nehe li laa' ani' ma nene o've naza a'mine ve ne nomuve. Eze nene alinge' nave. Naza lemo minuvoni' a'nemineli'mine eze dizo minive'mi gizeneloti' suu've nene ngelo apase hulo-delohe lo line'.

26 Zogone zuhokizo, Abalahamu' a'vopilemo' mate, ido' lingine heta ve mini O'mosomu' golise gili ezela gi'mizi minaa' nani' nene leze do lu' izelive lo mene gamazi lelikumu' ogo huline' ma ve. 27 Zelusalemi alevesi engi' gizebo ve'inesi Izesu' monovo ningi gili lamine' ami O'moso'mi gamazi li soto' iga' ave polohetelite gizikani' gamazi nene holise' mukiku' gataa' nani' nesi gili lamine' ami Izesu'ni gonito' ele'mizi mili helelive lani' ne'mo a'mine gizikani' gamazi di gihile izani'. 28 Lihime've nomivo ingine heleline' ne'mi monovo ma di soto' milamani'za hazamu' Pilatoda ti' li lani': Gaza bililo lanivo amilite bililizave lani'. 29 Ne'mine igi mono' godolou' ne'mine i-dilizave li ezemu' gamazi gizi nizani' malo' nene i-dikevo helavo lohoto' zaloti' apasi di galese izi-dani'za 30 O'moso'mo hilave engi' mulise'ninguti' do ote-dine'. 31 Do ote-davo engita soto' oka' oka' ivo ezesi maka' nGalilaia misubolati' duvi Zelusalemi ebeku' vi minave eze ningika' ningika' igi nizavo gamene muki' ine'. Ido' a'mine ve nete ningangumu' idisesi eze gamazi've li soto' igi evene' li-ngimaa' nave. 32 Li-ngimaa' navo lazasi gamazi lamine' mene lo-lengemo O'moso'mo Izesu'ni do ote-do avotemotinemu' gamazi lo huko lo-ngidine' nene nga'vopilemo' lelikumu' ogo mo do gihile izani' ma ve losa nemu' nolo-lingimusive. Do ote-dingumu' nene mono' godolou' Sam naba tu neu' ti' lo gize neine' ma neive:

34 Idise naza gei' maho lolo' ogo neni' gipe'ne gei' nene nane lo
do ote-giduvoni' ve.
Ido' Izesu'ni hilinguti' do ote-davo a'minguko gohi tine' molo vo gelesamiline' o neive. Nemu' nene O'moso'mo line' gamazi ma ti' lo gize neive:

Ele'vole' gamazi lo
Davidi'ni lo huko lo-duvoni' inite' lamine' nene lehize-lengedelesa nouve.
35 Nemu' ne gamazi gohi ma Davidi' aza O'mosomu' line' mene ti' lo neive:

Lu'ne geita molo gelekele' o-giduve neze hulo-nedanivo
oko'ne geleso unuvo amoloseive.
36 Davidi'nimu' mo gele none. Aza minine' gameneu' O'mosomu' ogo gelekele' o emo gono gamazi lo-dine' nene do osu' lo helavo avolomotine galese izi-ngidado' galese izi-dikevo oko'no geleso unuvo ine'za 37 geleso unuvo amive nene zaho neve. O'moso'mo do ote-dive ma ve. 38 Neze zuhokizo, nemu' lo-lengemeloze. Gili guni i minilo. A'mine ve'mo aka've do soto' ine' mamu' nene O'moso'mo lihimetine hulo-lengedelive lo gamazi've nolo-lingimusive. Ido' a'mine ve Izesu'nimu' gili ele'vole' ilizani' nene lihimetine muki' Mose' lou' gamazi gizingu' gilite-lengedamiline' o minine' nene O'moso'mo gilite osu' lo-lengedeleseive. 40 Ehe, O'moso'mi gamazi li soto' iga' ave polohetelite gizani' gamazi mau' gize neine' nene lengita soto' ogo gihile izalive lo nolo-lingimusize. Gizebo igi minilo. O'moso'mo line' gamazi ma ti' lo gize neive:

41 Agae, neni' gono'nemu' nene ha nite' ve li gilaa' nave lingine gililo.
Lingine nizani' gameneu' mene amebe gono dalosuvonako
a'minemu' nene li ngolo' li li-lingimilizanikisi
a'minemu' nene ngeli gili ele'vole' amilizani' nenako
nemu' nene lengehelele izivo mini sizaga li hili minilo lo gize neine' ma ve.
42 Paulo' ne'mine lavoo mono' numunguti' limi nasivo evene' nete holise' mau' nene igi idise lasine' initekumu' ihe' li-limilisine' nehe li longo' i-ngidani'. 43 Ido' evene' mono' numunguti' limi hutile' igi nivi Zuda ve linge masi ido' Zuda veti monoku' vi hilave linge masi evene' muki' Paulongi Banabasingi nge'meti nivavo ingine O'moso'mi mulumo nasahiliku' nene ele'vole' igi minilizave li ga'ine dasine'.

44 Ne'mine ikevo holise' mau' ebe' me'ninge ngomosi' ma numuda nizavo vai' goloso O'moso'mi gamazi gililisa ani'. 45 Vai' goloso ikevo Zuda ve nete evene' muki' ani' ningi ve'ine mulolo' ingihi Paulongi ido' Banabasingi lukehe naba ngibili Paulo' line' gamazi nesi ataize li di'mi limi-ngidi divi' ledivika li minani'. 46 Divi' ledivika li minikevo Pauloki Banabasiki gamazi livi' kiselivi' igi ti' li lasine': Lingine Zuda vemu' gomu' api' ogo O'moso'mi gamazi lo-lengemelone' o neivosa lo-lingimune'za lingine a'mine gamazi vasa izi hulikenako lingine O'moso'mo minevo' minevo' lengemeni dameni nene o've lo lengemamili inite' igi minani' nene langise idise di soto' ikeve. Nemu' nene laza heta ato' vela volosusive. 47 Nemu' nene Guvelesi ve'mo ti' lo lo leme neine' ve:

Gaza nene
heta ato' veliti lamu livi'ine ne'mine lolo' ogo mineline lo
gele'mize molokuve.
Ado' misubo lumola minave nesi lukuvo nalizani' aka nene gei' ngelebizeline lo
gele'mize molokuve.
48 Ti' li likesivo heta ato' ve ingine gili mulu'ningu' lamine' gili O'moso'mi gamazi'vemu' opo'ni li sizaga li-dani'. Ne'mine ikevo minevo' minevo' ngemenisi minilizave lo O'moso'mo gelo do gizeka' ine' aleve ingine gili ele'vole' ani'. 49 Ne'mine ikevo a'mine misubou' nene Guvelesi ve'mi gamazi ne'mo buu lo monine'. 50 Buu lo monine'za Zuda ve ingine a'mine ebeku' vene' ma dizi mini Zuda veti mono' numungu' mono' gili minani' nesi ve naba minanikisi mulu'ningu' hizikevo Paulongi Banabasingi gobonga li-ngidi numuno ebe'ninguti' ngimiseli hulikevo vasine'. 51 Vilisa nivi monovo'ine gililizave li avazaha igi hungo' mili gize'nidoti' u'musupo nene okoho' izi huli Ikonio ebeta vasine'. 52 Nivasivo Izesu' evenele zuho Adiokia ebeku' minani' ingine O'moso'mi Sikalahu' ne'mo lu'ningu' gono do neivo mulu'ningu' lamine' gili ngolize izi minani'.